將中醫湯水同快餐文化結合
其實我早喺二十年前已經諗過，如果能夠好好發展中醫湯水高科技化，確實可以舒緩部分西方醫藥公司過度壟斷嘅問題。原因好簡單：《黃帝內經》一早指出透過合理飲食，可以有效預防同減輕多種疾病。 當年我接咗一個 freelance 工作，為一間公司設計一個關於中藥湯水調理身體嘅網站。其實嗰陣時我已經提出，中醫湯水絕對可以成為一種高科技產業。配合當時董特首倡導發展科技同醫藥產業嘅大方向，我同嗰間公司老闆提議過建立一個「中藥湯水包自動調配系統（Dispensing System）」。只要肯投資、做得好，就可以衝出國際，成為香港品牌代表，亦有信心海外華人都會支持。加上西方快餐文化對小朋友未必太好，若果能夠透過中醫湯水減輕疾病發生率，某程度上亦可減低西方社會對醫療系統嘅負擔。 我一直覺得，香港要發展高科技，必須以自身文化做根基，而唔可以淨係靠地產項目去包裝「科技港」或「中醫藥港」。香港人生活節奏快，新一代港媽對煲湯未必熟悉，上一代媽媽雖然識，但而家時間又唔多。所以，如果有咗個「中藥湯水包自動調配系統」，就可以將好多傳統中藥食材15分鐘內變成美味又有保健功能嘅湯水或者甜品，例如豆漿、芝麻糊、雪梨川貝湯、百合蓮子湯、玉竹瘦肉湯、紅蘿蔔粟米湯、紅棗桂圓茶等等。假如快餐店引入呢套系統，變成一種普惠經濟模式，尤其係屋邨同居屋區嗰啲快餐店，街坊熟客多，亦可以考慮請中醫師到場，用睇舌頭、號脈等方式畀意見，因應唔同季節同病症調配合適湯水包。由於客源相對穩定，再配合天氣大數據，甚至可以預測每種湯水包所需嘅數量，提早製作同管理供應。 廣東人本身對飲食文化已經多元化，如果再結合先進科技，可以令呢種文化進一步升級，同時亦可以帶動中醫專業人才就業，為港式飲食文化增加更多崗位。當年香港電影《食神》都畀咗我靈感：好似「黯然銷魂飯」咁，味道同噱頭夠好，自然能夠賣貴少少；同理，一碗優質湯水，不但滋補身體，亦能有效預防疾病。如果大規模生產，成本反而可以壓低。再者，香港本身就有心做「中醫藥港」，相關配套成本亦會有優勢，對外輸出這類文化一啲都唔難，甚至可能造成同日本文化輸出相若嘅影響力。試想像全球麥當勞一年可以有二百幾億美元收入，證明大規模連鎖經營絕對有可行性。如果能夠發展出香港版本嘅「中醫湯水快餐」模式，配合科技同文化優勢，並唔難將佢做大做強，...
